買車斷斤秤

近排見到一間遙控車公司老闆，閒談講起近排一啲賣價好平好平遙控車。

大家講起呢啲平車價錢，個批發價聽完覺得係好誇張，因為講緊係平到你係好難搵到人做組裝，組裝錢可能已經係成本一半。甚至同汕頭澄海一帶生產商傾，都做唔到個價(汕頭澄海出名做超平玩具，同仿牌玩具)。好幾架個價計完成本係接近做一架蝕一架。

然後咁啱有人係YOUTUBE到話，某架車唔值幾多錢。坦白講，我自己都做跟進生產多年，我都出入汕頭東莞深圳廠商多年，有啲價錢我自己都知。價錢嚟講深圳最高但質最好，尤其係CNC準繩，再到東莞，之後先到汕頭。人地俾晒深圳造嘅OPTION零件你，成架車仲砌埋(砌一架車仲要RTR唔平，幾十至一百一架一定要)，你嫌人地貴，你用咩嚟比?

坦白講，呢啲就等如你攞架SNRC嚟同架XRAY比，話XRAY唔值。雖然唔係話SNRC唔玩得，但你試下比一比兩者零件，SNRC啲鋁件硬度係比唔上XRAY(問心講)，然後啲炭纖料錢都唔同(唔係話TORAYCA唔好但真係比美國料平)。仲有你要諗下XRAY放幾多車手去比賽，比咗幾多開發費用等等......但你淨係斷斤嚟秤，話佢啲炭纖值幾錢，佢啲鋁料值幾錢....... 坦白講，但鋁料係6061定7075都唔同價，佢表面加唔加硬鍍唔鍍膜都唔同價，你同我就咁攞住舊鋁舊件就話人唔值。

當然，幾時玩車嘅人同鬥車嘅人，諗法都唔同。玩車嘅，淨係睇平，一舊錢買多幾舊嘢玩。鬥車嘅人係要架車有戰鬥車，鬥到幫佢上到更高位。兩者諗法唔同。

但作為都係一個開發者，有時見到呢啲斷斤嚟秤嘅回覆，真係血都嘔幾啖.......

"畫張圖駛幾錢唧，整小小嘢駛幾錢唧~"

單係一個畫圖嘅SOFTWARE都要收你十幾萬，仲要每年收你成萬做MAINTANACE...... 呢.....又提醒我又要俾成萬出嚟續套SOFTWARE保養喇。你以為真係可以就咁斷斤秤?

至於果啲好平好平嘅車點解可以賣到咁平，冇人答到。但我都聽過有啲人賣車話要貼近淘寶價嚟賣。好喇，當你賣到成本價時，大家都搵唔到食，咁做乜?淘寶點解咁平，其一國內人工租金都平，其二好多人係避稅唔交稅。就算我唔計你香港要交稅，你香港租個OFFICE鋪位你覺得少錢嗎?仲要走入嚟同人地講:"喂淘寶計埋運費幾多幾多喎"，咁你唔去淘寶買?你上人地鋪人地唔駛成本?淨係賺你十幾廿蚊仲要上嚟俾你話架車壞咗唔著要換呀?

不過都聽聞其中一架賣到好平嘅車，因為太平，開始賣一架蝕一架，宜家開始有啲擺爛，索性唔交貨。結果會點呢?唔知。但咁賣法其實絕對唔係長做生意人應該做，對市場亦都唔健康。

希望大家買車時，唔好再斷斤秤，考慮下每一架車出嚟，個心思係值錢。

同一道理
老翻車殼通街賣,無言

G66 發表於 2020-12-2 07:19
同一道理
老翻車殼通街賣,無言

所以我成日都話，冇錢一係買其他殼，一係唔好玩。

啲人又會話啲底板抄人乜乜春春嚟講.......啲人硬係好鍾意話人地夠乜乜乜物物嚟逃避用老翻殼係唔啱事實。

OK，就同你講底板。

老翻殼，啲人係攞個殼去照DUP，就算俾你係抄數，都係抄襲。
啲代用底板，睇佢有冇改樣，自己改數或加入自己思考，冇的話，一樣係抄。